21 prill 2020/ Aurora Leka/ Porta Vendore/ Kamëz
Edhe pse nuk ka të dhëna zyrtare për të infektuar nga Kamza, banorët kryesisht përpiqen që evitojnë daljet e panevojshme e në mos të përdorin maska dhe doreza. Megjithë masat e marra nga organet vendore e qendrore, në tregun e fruta perimeve dhe në qendër të qyteti vërehet lëvizje të shtuara sidomos në orët e paradites.
Disa banorë shijojnë rrezet e diellin bash në stolat përballë Pallatit të Kulturës krejt të patrembur prej pandemisë më të madhe në botë. Në ditët përpara Pashkëve mbahet radhë te pastiçeria më e madhe e qytetit për të blerë ëmbëlsirën e festës, të tjerët duan ti kujtojnë vetes se po vjen vera duke marrë një akullore me fruta. Në rrugët kryesore lëvizin makineritë e ndërtimit të cilat nuk e kanë ndalur punën, dhe shumë biçikleta. Biçikleta me qese me ushqime të varura në dy krahë të timonit.
Më në periferi gratë mbjellin perimet siç kanë bërë çdo vit vetëm se kësaj radhe më me nge. Punojnë lulet, oborret e mbjellin jetën. Dielli shkëlqen asfaltet që shtroi kryetari i parafundit i bashkisë.
